WI

Wi Kau
Na drau ni wi oqo e via damudamu. Na vuana e lalai qai momoto. Ni dua e lutuka na wi oqo, e rawa ni tagi.

Wi ni Toga
Oqo e wi vua i lelevu ka mokimokiti vinaka. E kana vinaka ka wiwi ni vou.

E na qai vakuri tale yani .............................. Fijituwawa Research Team

VUTU

E kau tubu balavu ka dau se vulavula ka ra lilili tu. Ni se oti ga sa toka sara na vuana ka ra lili tu e na kena i tui. E dau kilai ni sa matua ni sa loa mai na vuana se ra sa misika na beka ka lulutu mai ki ra. E so na vutu ni sa matua sivia e dau gaga.

Vutu Kata
Na vutu oqo e ra dau vakamareqeta na qase baleta ni vutu lelevu ka rawarawa ni da katia na qana. E ra dau kaya na qase ni tabu ni taya na vutu oqo ni dau katakata dredre kina.

Vutu Damu
Oqo e damudamu na kulina ka via balavu toka me vaka na vutu kata. E quruquruta vinaka ni da kania.

Vutu Buli
E vutu mokimokiti vinaka ka vakalewe. E vutu kana vinaka ka rawa talega ni saqa.

Vutu Matanigasau
E vua lalai na kena oqo ka tubu tu vakalevu e na veiruka. Oqo tale ga e rawa ni saqa.

E na qai vajuri tale yani .................... Fijituwawa.com Research Team

IVI

Oqo e dua na mataqali kau tei vei ira na noda qase. E tubulelevu ka sega ni dau babalavu ia e tete yani na tabana. E vaqalita na kau oqo ka kau kaukauwa tale ga. E dau vakayagataki na drauna me i tutu ni lovo. E dau kilai levu ni sa matua na ivi ni dau misika na beka ka ra qera mai ki ra. Oqo e so na veimataqali ivi e dau kilai levu tu vei ira na noda qase:

Ivi Sere
Ni da sa taya na ivi oqo (droka) ka da na raica na kena i sala ni lewena ni viavia damu. Na vuana e dau vakarauta ga ka wadrega ni da kania.

Ivi Loa
Oqo e viavia lelevu cake toka mai na ivi sere. E tata rawarawa ka quruquruta ni da kania.

Ivi Damu
Na vua ni ivi oqo e vaka na bota ni drau ni vasili se masawe. E ivi kamikamica na kena i kanakana ka malumu tale ga. E vaka toka ga na lelevu ni ivi loa.

Ivi Madrai
Oqo e ivi vuavua i lelevu taudua. E dau ta ka yaca me madrai ka dau vakaicoitaki e na ika. E sega soti ni dau laukana vakalevu na ivi oqo.

Ivi Numunumu
Oqo na kena mataqali e lalai sara ka ra dau taleitaka tale ga na gone na vilika ni buta rawarawa ka wadrega duadua vei ira ivi kece ga.

E na qai vakuri tale yani .............. Fijituwawa.com Research Team

MOLI

Moli Kana
Oqo e dua na mataqali moli lelevu sara. E drokadroka na vuana ni sa qai vua vulavula ni sa matua se dreu. E damudamu na lewena. Na vuana vou ka lalai e ra dau vakayagataki e na veikove moli se veiciqo se veicaqe.

E na qai vakamacalataki tale yani vakamalua na veimataqali moli tale e so ka toka qori e ra.

Moli Karo

Na moli oqo e vavaku na kulina me vaka na moli kana. Na moli karo e varovaroa, lalai ka bilicaki ca. E wiwi ka drau lalai ka dau vakayagataki vakalevu e na kokoda, miti se me gunuvi me vaka na wainimoli.

Moli Lecau se Taiti

Oqo e dua na moli gunu vinaka ka levu cake mai na moli karokaro. E lelevu toka na drauna, moli kaukauwa ka sega soti ni vavaku na kulina. E mokimokiti vinaka, e rawa ni civi, voci se koso e loma me rawa ni gunuvi.

Moli Madirini

E drau lalai ka sega so ni vakavotona. E moli taleitaki, kuli mamare mai na moli lecau ka dau sobe na vua ni moli oqo. E moli kamikamica ni sa dreu ka rawa ni caka me wainimoli.

Moli Kurukuru

E vaka na i rairai ni moli karokaro, ia e drolua ga na kulina. E wiwi talega na moli oqo.

E na qai vakuri tale yani.... Fijituwawa.com Research Team

UTO

Uto
E kau yaga na uto ka dau tei na wakana se na luve ni uto lalai. E kau tubu totolo ka rauta ga ni yabaki 3 sa vua ka dau bula dede tale ga. E dau vuavua i ya dua se ya rua ka tabalesi rawarawa na tabana. Oqo e vica wale sara na mataqali uto e dau kilai raraba tu:

Balekana
E tubu waruta na vuna ka sega ni dau bale na vuana. E na gauna ga e dau bale kina na vuana, e sa i vakaraitaki ni sa matua. Oqo e yacana kina na balekana.

Koqo

E vaka na i rairai ni balekana ia ni sa vua e na lili e kasana. E uto kaukauwa ka rawa ni mai tu me siga vica ka sega ni ca.

Uto Dina

E dau rua na kena mataqali; e dua na Uto loa ka kena i karua na Uto cago. Na uto oqo e lelevu cake mai na balekana kei na koqo ka mokimokiti vinaka sara. Na kedrau duidui ga ni cagocago o koya ka dua ka sega ko koya ka dua. E rau uto kana vinaka dina ka kaukauwa.

Varaqa

E tubu leleka toka ga ka ra dau tea na qase ena yasa ni nodra i teitei. E uto vuavua i lelevu sara ka mokimokiti vinaka ka kana vinaka tale ga. Na drauna e via masamasa toka vakalailai ka qai lelevu vinaka

Uto Sokisoki se Votovoto

E vaka na varaqa na kena i rairai ia e via balavu toka vakalailai ka varovaora. E dau sikavi drega vakalevu ni matua

Buco

E rua na kena mataqali: na Buco Dina kei na Buco Wasoi se Matanigasau. Na buco dina e lelevu ka mokomokiti kei na kena ka dua e balavu toka, vutevute ka lelevu tale ga. E rau dau vakayagataki vakalevu na uto oqo ena yakiyaki kei na vakalolo. E kana vinaka tale ga ni dau tavu.

Bati

E vaka ga na balekana kei na koqo ia e uto kaukauwa ka dau vea berabera. E rawa ni ratou kilasevati na uto e tolu oqo: na koqo, balekana kei na bati.

Bokasi

E uto vua i lalai sara ka rawa ni da boboka toka ni sa buta. E uto taleitaki ka kana vinaka.

E na qai vakuri tale yani .............. Fijituwawa.com Research Team